Algun faktor ta hunga un rol ora surgi un CVA:
• E arterianan a sera a konsekuensia di kolesteròl haltu (ta kome kuminda muchu vèt) of si e persona tin suku (diabétis mellitus)
• Preshon haltu ku no ta bou di tratamentu (ta gasta muchu salu)
• Humamentu i uso eksesivo di alkohòl
• Estorbo den e ritmo di kurason i behes
• Di mas peso i muchu tiki ehersisio
• Strès
Un CVA kasi semper ta tuma lugá na un banda di e serebro: sea e parti robes of esun drechi. Den tur dos kaso e suministro di sanger na e parti aki di a serebro ta defisiente. E parti afektá di e serebro ta haña muchu poko oksígeno i e ta sufri daño. Mayoria biaha no ta henter e banda ta sufri daño dor di e defisiensia di sirkulashon di sanger, sino un parti di esaki.
Kua parti? Esaki ta varia di pashènt pa pashènt. Kada banda di e serebro tin funshonnan spesífiko i esaki ta desisivo tambe pa e defisiensianan di funshon ku por surgi.
Komplikashon
Komplikashon Una bes ku duna e diagnósis i resultá ku ta trata klaramente di un CVA, lo disidí si ta interná e pashènt. Esaki atrobe ta dependé di a grado di seriedat di e CVA. Banda di e defisiensianan di funshon di e serebro por surgi tambe komplikashonnan, debí ku e pashènt por ta na kama.
• infekshon, por ehèmpel di pulmon i/òf kanalnan di urina.
• kentura
• chèns pa haña decubitis (heridanan kousa pa motibu di drumimentu largu)
• keho di gulimentu ( pega ku skupi)
• konstipashon - sera di kurpa
• hinchamentu - oedeem - pa motibu di e atake
• por surgi un di dos of di tres atake
• desareglo di malesanan eksistente, manera diabétis, malunan di kurason, defisiensia den funshonamentu di nir, etc.